Советот за оценка на обвинителен акт при Основниот кривичен суд Скопје во целост ги прифати двете обвиненија поднесени од Обвинителството за гонење организиран криминал и корупција. Со оваа одлука, патот кон судница е отворен за предметите поврзани со трагедијата во кочанскиот објект „Пулс“ и коруптивните злоупотреби со европските фондови.
Првиот предмет се однесува на 13 полициски службеници кои се товарат за „Тешки дела против општата сигурност“. Случајот е поврзан со страотниот пожар кој избувна на 16 март 2025 година во објектот „Пулс“ во Кочани. „Обвинителниот акт против 13 полициски службеници кои се товарат дека сториле кривично дело – Тешки дела против општата сигурност, поврзани со пожарот… се одобрува во целост“, соопштија од Кривичниот суд.
Вториот одобрен акт опфаќа финансиски малверзации и примање поткуп во врска со европската ИПАРД програма. Во овој случај се обвинети пет физички лица за давање и примање поткуп, додека обвинителен предлог е поднесен против уште четири лица и една фирма за противзаконито влијание.
Предметите веќе се распределени кај надлежни судии преку АКМИС-системот, а термините за почеток на судењата ќе бидат дополнително објавени.