СДСМ излезе со остри обвинувања на сметка на ВМРО-ДПМНЕ, тврдејќи дека резултатите од гласањето на болните и изнемоштените лица во Брвеница биле објавени јавно уште пред да се отворат запечатените гласачки кутии. Портпаролката на партијата, Богданка Кузеска, на прес-конференција истакна дека станува збор за истите методи на манипулација од минатото и побара итна реакција од надлежните институции.
Според наводите на СДСМ, на 17 октомври во Брвеница гласале 85 од пријавените 88 болни и немоќни лица, а веднаш по гласањето во саботата, партиски профили и медиуми блиски до власта ги објавиле точните бројки од гласањето пред официјалното отварање на кутиите на денот на изборите.
„Како знаеле ден порано? Болните и немоќните гласаат дома, во присуство на комисија. Кутиите се затвораат и се отвораат на денот на изборите, заедно со гласовите од редовните избирачки места. Не се бројат и не се објавуваат претходниот ден, освен ако некој веќе знаел што има внатре“, истакна портпаролката на СДСМ Богднака Кузеска.
Од опозициската партија оценуваат дека ова укажува на сериозни сомнежи за нелегална контрола врз изборниот процес и потсетуваат на практики од минатото, обвинувајќи ја актуелната партиска структура дека ги користи истите методи.
Поради овие случувања, СДСМ побара од Основното јавно обвинителство веднаш да отвори итна истрага за да се утврди како е можно резултатите од запечатените кутии да бидат познати и објавени јавно пред нивното официјално броење, барајќи одговорност за сите инволвирани лица.