Основното јавно обвинителство Битола донесе Наредба за спроведување истражна постапка против 28-годишен маж, за кого постои основано сомнение дека сторил обид за убиство при семејно насилство, согласно член 123 став 2 точка 2, во врска со член 19 од Кривичниот законик.
Според обвинителството, на 17 јануари, во домот на улицата „Лавчанска корија“, каде што заеднички живееле, осомничениот се обидел да ја лиши од живот својата баба. Претходно ја блокирал и затворил влезната врата од куќата со фиока, по што со рацете ја удирал по главата и телото сè додека таа не паднала во бессознание.
Со нападот ѝ нанел повеќе тешки телесни повреди, вклучувајќи крварења и нагмечувања на мозокот, скршеници на ребрата и исчашувања на коски, со што сериозно бил загрозен нејзиниот живот. По настанот, осомничениот избегал, но за кратко време бил пронајден и приведен.
Јавниот обвинител до судијата на претходна постапка при Основниот суд во Битола доставил предлог за определување мерка притвор, поради опасност од бегство, можност за влијание врз сведоци и ризик од повторување на кривично дело.
Во соопштението се наведува и дека исказите на дел од сведоците укажуваат на неодамнешни промени во однесувањето и психичката состојба на осомничениот, поради што постои сомневање дека тој можеби боледува од душевна болест. Врз основа на стручно мислење, обвинителството предложило по определување на притвор, судот со посебно решение да го упати осомничениот на медицинска опсервација и психијатриско вештачење во ЈЗУ Психијатриска болница Демир Хисар, во траење од најмалку еден месец.