Дирекцијата за заштита и спасување (ДЗС) денеска во Битола, на локација над старата касарна, откри и отстрани 1.700 рачни бомби и тромблонски мини кои потекнуваат од Првата светска војна.
Станува збор за истата локација во близина на населено место каде што пролетоска исто така беше пронајден поголем арсенал од неексплодирани убојни средства.
„Се отстранува голема опасност за куќите кои се наоѓаат на 200 метри воздушна линија од местото со бомби. Ископувањата продолжуваат понатаму, а се очекува да се пронајдат уште повеќе од 1.000 вакви бомби, но и други видови на неексплодирани убојни средства. Во акцијата освен пиротехничарот од Битола, Ѓорги Стефанов, поради недостиг на стручни кадри во ДЗС му помагаат и тројца пензионирани припадници од МВР. Двајцата од нив се поранешни припадници на специјалната единица „Тигри“ и еден пензиониран припадник од Отсекот за антитероризам при МВР, тројцата ангажирани со договор на дело“, истакна Стојанче Ангелов, директор на ДЗС.
Ангелов упати и апел до граѓаните, доколку наидат на предмети кои наликуваат на бомба, граната или било каков проектил, веднаш да се јават на телефонскиот број 112 за стручните екипи да можат безбедно да го подигнат убојното средство.