Ако властите во Скопје сакаат да бидат дел од ЕУ, мора да го следат патот трасиран со францускиот предлог од 2022 година, порача премиерот на Бугарија, Росен Жељазков, отфрлајќи ја можноста за каков било нов билатерален протокол кој би дал дополнителни гаранции.
Жељазков истакна дека не може да има поголема гаранција за Македонија од едногласната одлука на Бугарското Народно Собрание и дека барањето „невидливи влијанија“ кај светските политички играчи нема да го промени бугарскиот став.
„На колегите од Скопјe треба да им биде јасно дека стоиме зад овој став, бидејќи е принципиелен. Нема да менуваме ништо во однос на претворање во билатерален спор, ниту во барање невидливи влијанија и интеракции со главните политички играчи низ целиот свет“, потенцираше Жељазков.
На прашањето дали Бугарија би направила гест со повлекување на условот за уставни измени, тој одговори негативно.
„Не мислам дека воопшто постои таков разговор… Ако властите во Скопјe сакаат да бидат дел од ЕУ, тие мора да одат по овој пат, што е дел од ставот на самата Европска Унија кон Скопјe“, укажа бугарскиот премиер во емисијата „Недела 150“.