Украинскиот претседател Володимир Зеленски стравува дека новата ескалација на Блискиот Исток директно ќе влијае врз одбранбената моќ на неговата земја. Во интервју за италијанскиот весник „Кориере дела Сера“, тој посочи дека САД и сојузниците би можеле да ги пренасочат резервите на оружје за сопствени потреби.
„Можеме да се соочиме со тешкотии во набавката на ракети и системи за одбрана на нашето небо. Американците и нивните сојузници може да ги задржат за свои потреби“, изјави Зеленски.
Сепак, тој го поддржа нападот врз иранските цели, нагласувајќи дека Техеран е клучен снабдувач на Русија со беспилотни летала и ракети. Зеленски исто така оцени дека рускиот претседател Путин е „ослабен“ по неуспешната зимска офанзива врз украинскиот енергетски сектор.
Украинскиот лидер беше дециден дека нема да има повлекување од Донбас, бидејќи тоа би им го отворило патот на руските сили кон внатрешноста на државата.