Црвениот крст на град Скопје подготвува низа активности по повод Неделата на грижа за старите лица, со кои ќе им понуди на повозрасните граѓани здравствена, социјална, едукативна и рекреативна поддршка.
Програмата ќе се реализира преку социјалната услуга „Центар за дневен престој за стари лица за активно стареење и Центар за давање помош во домашни услови“, со акцент на подобрување на квалитетот на животот и поголема вклученост на повозрасните во заедницата.
Во рамки на активностите ќе бидат организирани здравствени пунктови на повеќе локации во Скопје, каде граѓаните ќе можат да го измерат крвниот притисок и шеќерот во крвта. Предвидени се и офталмолошки прегледи, ЕКГ-контроли, физиотерапевтски и фризерски услуги.
Програмата опфаќа и посета на Домот за стари лица „Светла Надеж“, театарска претстава и рекреативна прошетка во Крушево.
Највозрасните ќе имаат можност да учествуваат и во музичко-забавна програма, заедничка подготовка на зимница со учениците од ОУРЦ „Д-р Златан Сремец“, како и на хуманитарен базар во Старата скопска чаршија.
Од Црвениот крст информираат дека услугата се спроведува со поддршка на Министерството за социјална политика, демографија и млади и Град Скопје, а месечно опфаќа повеќе од 1.500 корисници во дневните центри за стари лица.
Целта е да се обезбеди поголема поддршка за повозрасните граѓани, да се намали нивната осаменост и да се поттикне нивното активно учество во општествениот живот.

