Народната банка започна постапка за продажба на доминантниот акционерски пакет во „Алта банка“ АД Битола, со цел да се најде нов сопственик кој ќе обезбеди услови за стабилно продолжување на работењето на Банката.
Предмет на продажбата се 372.742 обични акции, што претставуваат 95,336 проценти од вкупниот број акции. Тие се во сопственост на „Алта банка“ АД Белград, која е во стечај.
Продажбата ќе се реализира преку Македонската берза на хартии од вредност, по принципот „сè или ништо“, односно заинтересираните инвеститори ќе мора да го купат целиот понуден пакет, без можност за делумно преземање на акциите.
Првата јавна берзанска аукција е закажана за 30 ноември 2026 година, со почетна цена од 3.777 денари за една акција.
Од Народната банка информираат дека доколку не се најде купувач на првата аукција, продажбата ќе продолжи на 1, 2, 3, 4 и 7 декември. При секоја наредна аукција почетната цена ќе биде намалена за 10 проценти во однос на претходната.
Заинтересираните инвеститори имаат рок до 19 ноември 2026 година да поднесат барање до Народната банка за добивање претходна согласност за стекнување квалификувано учество во Банката. Потребно е и да достават писмена изјава дека располагаат со средства за купување на акциите.
Право на учество во аукциите ќе имаат само инвеститорите кои ги исполнуваат законските услови.
Од Народната банка посочуваат дека со оваа постапка се прави обид да се обезбеди нов сопственик, да се создадат услови за натамошно функционирање на Банката и да се заштитат интересите на штедачите и останатите клиенти.

