Трагично заврши потрагата по црногорскиот планинар Ц.Ф., чие безживотно тело беше пронајдено вчера на северните падини на планината Хајла. Несреќата се случила во саботата, кога планинарот се лизнал и паднал во клисура на надморска височина од 2.407 метри.
Алармот го кренале хрватски планинари кои биле сведоци на падот и веднаш испратиле SOS порака. Тие пријавиле дека по падот на црногорскиот државјанин во клисурата, целосно го изгубиле контактот со него.
Во големата прекугранична операција учествуваа спасувачките служби од Косово и Црна Гора, кои се соочија со екстремно тешки временски услови и слаба видливост. Телото на починатиот е лоцирано на местото викано „Јама“ и веќе е предадено на надлежните институции за понатамошна постапка.