Жителите на Гостивар, Врапчиште, Центар Жупа и Маврово и Ростуше нема да гласаат за градоначалник в недела, бидејќи во овие општини во првиот круг од Локалните избори 2025 не беше исполнет законскиот цензус.
Државната изборна комисија (ДИК) соопшти дека за овие четири општини ќе мора да се спроведе нова изборна постапка. Причината е што излезноста во првиот круг не достигна најмалку 33,33 проценти од запишаните гласачи.
Колку гласале:
- Центар Жупа: Најслаба излезност со само 21,49 проценти.
- Врапчиште: Излезени 25,18 проценти.
- Маврово и Ростуше: Излезност од 30,31 проценти.
- Гостивар: Недостигаа само 0,02 проценти, со постигната излезност од 33,31 проценти.
Согласно Изборниот законик, доколку овој праг не се достигне, мора да се повтори целата изборна постапка. Новите избори ќе се одржат најдоцна 60 дена по објавувањето на конечните резултати од Локалните избори 2025, а при повтореното гласање нема да се бара условот за излезност од една третина.
Инаку, вториот изборен круг за останатите општини се одржува в недела, кога ќе се избираат градоначалници во 32 општини и во Градот Скопје. Во првиот круг, градоначалници беа избрани во 44 општини.