Под влијание на топла воздушна маса од југ, за време на продолжениот викенд и во текот на следната седмица нè очекува сончево и многу топло време со мала до умерена локална облачност.
Високите температури ќе продолжи да се чувствуваат и во текот на вечерните и ноќните часови.
За денеска се прогнозира многу топло време со слаб до умерен ветер од променлив правец, при што минималната температура ќе се движи од 11 до 21, а максималната ќе достигне од 33 до 39 степени.
Поради топлотниот бран, Институтот за јавно здравје (ИЈЗ) препорачува да се избегнува излегување на отворено во периодот од 11 до 17 часот.
Експертите советуваат носење лесна и светла облека, заштитни очила и капа, како и чести одмори во сенка за сите кои престојуваат надвор.
Во однос на исхраната и хидратацијата, се препорачува умерено консумирање храна, избегнување масни, калорични и благи производи, како и редовно пиење вода и безалкохолни пијалаци без чекање да се почувствува жед. Алкохолот, пијалаците со кофеин и многу ладните напитоци треба да се избегнуваат.
Посебна дисциплина им се препорачува на ранливите групи, во кои спаѓаат лицата над 60 години, бремените жени, децата, хронично болните и работниците на отворено, кои треба редовно да ја земаат својата терапија и за секоја промена да се консултираат со матичниот лекар.
Доколку се појават симптоми како зашеметеност, слабост, вознемиреност или интензивна главоболка, потребно е веднаш да се премине во постудена просторија и да се внесат течности. Во случај на топлотни грчеви во мускулите кои траат подолго од еден час, задолжително треба да се побара лекарска помош.