Иако летната сезона полека привршува, крадците на популарните грчки летувалишта не престануваат. На нова и добро осмислена тактика на крадци предупреди туристка од Србија, која доживеала непријатно искуство на плажа во Пефкохори, едно од омилените места на српските туристи на Халкидики.
Како што наведува таа, измамата ја изведуваат две жени кои глумат конфликт за да го одвлечат вниманието на туристите и да дојдат до нивните вредни предмети.
„Две жени работат заедно и крадат. Едната се прави дека ја нема блузата, па почна да ги подига и пребарува нашите работи. Кога ја прашав што прави, ми рече дека ја бара блузата. Набргу потоа, наводно забележала дека блузата е кај другата жена. Почнаа да се караат, но очигледно беше дека го глумат конфликтот, по што си заминаа. Претходно постојано ги меркаше нашите работи и нè набљудуваше. Апелирам до сите да внимаваат. Станува збор за две жени кои зборуваат германски јазик“, напишала членка на Фејсбук групата „Грчка инфо“.
На граѓаните кои летуваат во Грција им се советува да бидат особено внимателни, најмногу на преполните плажи, каде што ваквите однапред режирани ситуации може да се користат за да им се одвлече вниманието на туристите и да се украдат нивните лични предмети.