Со освоени 550 советнички места низ целата држава и градот Скопје, како и над 300.000 гласови, ВМРО-ДПМНЕ ја потврди довербата од граѓаните, се наведува во соопштението на партијата.
Од ВМРО-ДПМНЕ информираат дека партијата бележи раст од 82 советнички места, односно зголемување од 17,5% во споредба со претходните локални избори.
Според податоците што ги наведуваат, опозициската СДСМ освоила околу 230 советнички места, што е 166 помалку од минатите избори, или 42% помалку во однос на претходниот изборен циклус. Исто така, од ВМРО-ДПМНЕ посочуваат дека СДСМ има и значителен пад во бројот на гласови – околу 126.000 гласа, што претставува намалување од 111.000 гласови во споредба со изборите во 2021 година.
Партијата успехот го припишува на, како што наведуваат, големиот број реализирани проекти во општините предводени од ВМРО-ДПМНЕ – изградба на градинки, училишта, здравствени домови, пазари, атмосферска и фекална канализација, како и субвенции за инвертер клими, велосипеди, електрични тротинети и финансиска поддршка за социјално ранливи категории.
„Ова е потврда дека сме на прав пат и дека треба да продолжиме со работа за граѓаните. Затоа, на 2 ноември, ги повикуваме граѓаните повторно масовно да излезат и да го заокружат бројот 9 – за својот човек, за своето место, за својата иднина“, стои во партиското соопштение.