ВМРО-ДПМНЕ остро реагираше на настапот на лидерот на СДСМ, Венко Филипче, порачувајќи му дека нема кредибилитет да зборува за стандардот на пензионерите, бидејќи додека бил на власт, покачувањата биле симболични и понижувачки.
Од владејачката партија потсетуваат дека владата предводена од Зоран Заев, чиј дел беше и Филипче, на оваа категорија граѓани им доделувала минимални суми.
„Аман Филипче не се грижи! Заборавил ли Филипче дека беше дел од владата на СДС? Владата на СДС, онаа влада која на пензионерите им даваше некоја ситна сума од околу стотина денари, а во одреден период достигнуваше 1000 денари или илјада и нешто“, се вели во партиската реакција.
ВМРО-ДПМНЕ смета дека СДСМ е партија која шири дезинформации и во која поединци се грижат само за личниот џеб, додека, според нив, ВМРО-ДПМНЕ се грижи подеднакво за секој граѓанин.
„Владата предводена од другарот на Филипче, Заев, не само што не се грижеше за пензионерите, туку со сумата која им ја даваше ги понижуваше, навредуваше или што уште не. Вака ли се грижеа тие за пензионерите“, прашуваат од партијата.