Министерството за одбрана и Армијата од 2013 година покажуваат значителен напредок во интегрирањето на родовата компонента. Бројот на припаднички во Армијата континуирано се зголемува, над 50 проценти од раководните позиции во Министерството за одбрана ги заземаат жени, а женскиот персонал учествува и во сите мировни мисии, истакна министерот за одбрана, Владо Мисајловски, на денешното одбележување на 25-годишнината од усвојувањето на Резолуцијата на ОН 1325 – „Жени, мир и безбедност“.
„Особено сакам да го истакнам процентот на офицерки кој достигна околу 23 проценти, бројка која постојано расте и е најголема досега. Овде би сакал да додадам дека забележителен успех можеме да видиме во Министерството за одбрана, кој денеска процентот на жени кои се на раководни позиции изнесува над 50 проценти. Мислам дека претседателката со овој податок ќе биде многу задоволна. Имаме се поголем интерес на женската популација која станува дел од Армијата, а верувам дека и вие ќе се сложите дека се должи и на оние припаднички кои во сите овие изминати години завршуваа како најуспешни меѓу питомците на Воената академија, но и на сите оние припаднички кои со гордост ја носат македонската униформа“, посочи Мисајловски.