Потпретседателката на Социјалдемократската младина на Македонија (СДММ), Стефанија Кузмановска, на денешната прес-конференција упати сериозни критики до Министерството за образование и наука и владејачката партија, тврдејќи дека со новите законски измени директно се загрозува студентскиот стандард.
Кузмановска истакна дека реакцијата на младите е одговор на обидите на власта да ги минимизира проблемите во високото образование.
„Наместо да застане на страна на младите и студентите и да им помогне, криминалната ВМРО ја напаѓа младината и опозицијата, како да не ги разбираме измените на Законот. Ова не е ништо ново за ВМРО – ОКГ на која приоритет и се криминалните тендери, а не студентите кои се двигатели на иднината на државата. Откако студентите кренаа глас против политиките на ВМРО, власта панично се обидува да го минимизира проблемот.“
Според СДММ, официјалните оправдувања за реформи на пазарот на трудот се само параван за намалување на фондот наменет за социјално загрозените студенти.
„Со бирократски фрази и празни оправдувања за наводна „подобра прераспределба на стипендиите“ и „потреби на пазарот на трудот“, ВМРО сака да го прикаже кратењето на стипендиите као наводна реформа и грижа за младите. Младите многу добро знаат дека ВМРО ја крати можноста за повеќе стипендии за социјално ранливите категории на студенти – оние на кои им е најпотребна. Од вкупниот број на стипендии наместо како досега 49%, сега 40% ќе бидат за студентите од социјално ранливи категории.“
Во соопштението се наведува дека новите одредби ќе се одразат и врз сместувачките капацитети, поддржувајќи ги ставовите испратени во писмото до министерката Јаневска.
„Со законските измени кратат и од поддршката на студентите за сместување и исхрана и свесно создаваат двокласен систем во високото образование – студенти од привилегирани семејства и студенти кои ќе мора да се снаоѓаат како знаат и умеат. Затоа и реагираат младите студенти. Целосно оправдани се реакциите на студентите во писмото упатено до Јаневска.“
Од СДММ ја обвинија министерката за затворање на вратите за дијалог со високообразовните структури, што според нив води кон зголемено иселување.
„Оваа криминална власт ги демотивира најуспешните млади луѓе, а со кратењето на стипендиите и игнорантскиот однос директно удира врз квалитетот на образованието. Хаос се случува на државниот универзитет, а министерката Весна Јаневска нема ниту слух, ниту желба да ги слушне студентите. Тоа е вистинското лице на оваа власт – арогантна, одлепена од реалноста и неспособна да ги слушне младите, освен кога треба да ги користи за политички маркетинг. И точно како што велат студентите во писмото до Јаневска- оваа власт ги уништува студентските соништа“, го деградира високото образование и го поттикнува иселувањето на младите од државата.“
На крајот, Кузмановска порача дека младинската организација ќе се приклучи на поширокиот опозициски фронт за остварување на стратешките цели.
„Социјалдемократската младина на Македонија ќе продолжи гласно да се бори за достоинствен студентски стандард, за еднакви услови и вистинска поддршка за младите. Нема да дозволиме оваа криминална и расипничка власт да ни ја одземе и последната надеж за достоинствен живот во нашата татковина. Се приклучуваме на Фронтот за вистина и правда, затоа што ние младите сакаме членство во ЕУ. Тоа за нас младите и за студентите значи еднакви услови и вистинска поддршка.“