Екипите на терен деноноќно работат на локализирање и гаснење на пожарот на депонијата во Радовиш, а локалната власт и надлежните служби постојано се ангажирани со соодветна механизација, реагираат денеска од Општинскиот комитет на ВМРО-ДПМНЕ Радовиш.
Од партијата го обвинија локалниот СДСМ дека наместо конструктивност, ја користи кризната состојба за собирање ситни политички поени и замајување на јавноста со селективни видеоматеријали.
Според зборовите на Марија Иванова од ОК Радовиш, крајно нечесно е да се тврди дека институциите не преземаат мерки, кога Јавното комунално претпријатие и Територијалната противпожарна единица се постојано на локацијата.
„Дополнително, граѓаните се сведоци дека видеата кои се објавуваат од страна на СДС Радовиш, се снимаат токму на самата депонија и во моменти кога активностите на терен се во тек, но намерно се изоставуваат клучните делови каде што механизацијата и екипите интензивно работат. Со ваков селективен приказ повторно се создава искривена слика и се доведуваат граѓаните до заблуда“, изјави Иванова.
Таа додаде дека повторувањето на ваквите пожари секоја година, како и ланските слични ситуации низ целата држава, отвора сериозни прашања за кои очекуваат институциите целосно да ја утврдат фактичката состојба.
„Факт е дека пожарите и ваквите појави секоја година се повторуваат. Минатата година гореше речиси цела Македонија, шуми, депонии и отворени површини, а сега повторно сме сведоци на слични ситуации. Сето тоа отвора сериозни сомнежи и прашања дали станува збор за организирани и координирани активности, за што очекуваме институциите целосно да ја утврдат фактичката состојба“, потенцираше таа.
Од ОК ВМРО-ДПМНЕ Радовиш порачаа дека нивниот приоритет останува заштитата на граѓаните и целосното ставање на состојбата под контрола, најавувајќи навремено и транспарентно информирање.
На крајот од прес-конференцијата, Иванова упати и јавна благодарност до сите пожарникари по повод нивниот празник, Денот на пожарникарите, за нивната пожртвуваност и деноноќен ангажман на терен.