Ангола и Намибија постигнаа договор со Велика Британија за прифаќање на нивни државјани кои нелегално престојуваат во земјата, како и лица осомничени или осудени за криминал, откако Лондон се закани со воведување визни санкции за државите што одбиваат соработка, соопшти британското Министерство за внатрешни работи.
Истовремено, британските власти објавија дека на Демократска Република Конго ѝ е укинат забрзаниот режим за добивање визи, како и преференцијалниот третман за државни службеници и носители на одлуки. Оваа мерка е воведена поради, како што наведуваат британските медиуми, недоволна соработка со Лондон во делот на враќање на лица без право на престој.
Министерката за внатрешни работи Шабана Махмуд порача дека Велика Британија е подготвена дополнително да ги заостри мерките, вклучително и целосно запирање на издавањето визи за ДР Конго, доколку не дојде до итно подобрување на соработката.
„Очекуваме земјите да ги почитуваат меѓународните правила. Доколку нивен државјанин нема право на престој во Велика Британија, тие имаат обврска да го примат назад“, истакна Махмуд.
Според британските медиуми, договорите со Ангола и Намибија претставуваат прва конкретна промена во рамките на новите миграциски реформи објавени минатиот месец. Тие предвидуваат воведување привремен бегалски статус и забрзување на депортациите на лица кои нелегално влегле во земјата.
Министерката за надворешни работи Ивет Купер изјави дека Велика Британија во текот на минатата година депортирала повеќе од 50.000 лица без законско право на престој, што претставува пораст од 23 проценти во споредба со претходната година. Таа додаде дека на дипломатските претставништва им било наложено прашањето за враќање на мигрантите да биде врвен приоритет.