Вапцањето и украсувањето велигденски јајца е еден од најстарите христијански обичаи.
Симболичкото значење на овој обичај е претставувањето на воскресението. Исто како што Христос ја скршил вратата на смртта и воскреснал од мртвите, така и кокошката ја крши лушпата од јајцето и излегува во нов живот.
А зошто се бојат јајцата ни кажува легендата за Марија Магдалена, која дошла во Рим да го проповеда Евангелието Христово и стигнала до царот Тибериј.
Царот Тибериј не верувал во воскресението на Христос и рекол дека тоа би било како јајцата во кошничката што Марија Магдалена му ја донела како подарок да ја променат бојата.
Марија Магдалена на тоа рекла: „Христос воскресна!“ и сите јајца во кошничката станале црвени.
Друга легенда вели дека жителите на Ерусалим им се потсмевале на христијаните, велејќи дека Христос не воскреснал, бидејќи било исто толку невозможно како што било невозможно кокошките да снесат обоени јајца. На Велигден, сите кокошки во Ерусалим снесувале црвени јајца.
Црвената боја ја претставува невината крв пролеана на Голготата, но е и боја на радоста и воскресението.