Воздушниот сообраќај на аеродромот во германскиот град Нирнберг беше привремено прекинат по безбедносна тревога предизвикана од пријави за сомнителен летечки објект, за кој се претпоставува дека би можел да биде дрон.
Според информациите што ги објави британски „Скај њуз“, сите дојдовни и појдовни летови биле суспендирани до понатамошно известување, додека германските безбедносни служби спроведувале проверки во околината на аеродромот.
Инцидентот се случил непосредно пред планираното слетување на патнички авион што пристигнувал од грчкиот остров Крф. Портпаролот на аеродромот потврдил дека авионот безбедно слетал, но и дека бил следен од борбени авиони од типот „Еурофајтер“.
Според германската полиција, тројца пилоти независно еден од друг пријавиле дека забележале сомнителен објект во близина на аеродромот, за време на операции на полетување и слетување, во периодот меѓу 2 и 4 часот по полноќ.
Во потрагата бил ангажиран и полициски хеликоптер, но при проверките не бил откриен објект што би ги потврдил пријавите. Според најновото достапно известување на „Скај њуз“, полицијата соопштила дека по проверките на терен не е утврдена опасност и дека на патниците им било дозволено да го напуштат авионот, додека германските власти засега не потврдија намерно нарушување на безбедноста.