Воздушниот простор над и околу Венецуела треба да се смета за „целосно затворен“, објави денеска американскиот претседател Доналд Трамп, во услови на сè позатегнати односи со венецуелскиот претседател Николас Мадуро.
Трамп ја испрати пораката преку својата социјална мрежа „Truth Social“, адресирајќи ја не само до авијатичарите, туку и до криминалните групи.
„До сите авиокомпании, пилоти, трговци со дрога и луѓе, ве молиме сметајте го воздушниот простор над и околу Венецуела за целосно затворен!“, напиша Трамп.
Овој потег доаѓа откако американската администрација го засили воениот притисок во регионот, распоредувајќи војска и најголемиот носач на авиони во светот во Карибите, како дел од борбата против нарко-картелите.
Федералната администрација за воздухопловство на САД (FAA) уште минатата недела ги предупреди авиокомпаниите за „потенцијално опасна ситуација“ поради зголемената воена активност. Како одговор на тоа, Венецуела им ги одзеде оперативните права на шест големи меѓународни авиокомпании кои ги суспендираа летовите.