Велика Британија приреди педантно осмислен и раскошен дочек на американскиот претседател Доналд Трамп, во рамки на неговата официјална посета, со целосна кралска помпа, пренесува „Њујорк тајмс“. Трамп и првата дама Меланија хеликоптерски пристигнаа од Лондон во Виндзор, каде ги пречека кралското семејство на Велика Британија. По пристигнувањето, положија венец на гробот на кралицата Елизабета Втора, по што следеше свечена церемонија.
Посетата беше обележана со симболични гестови и размена на подароци. Крал Чарлс III му подари на Трамп книга со кожен повез по повод 250-годишнината од Декларацијата за независност, како и знаме на Обединетото Кралство кое се виореше над Бакингемската палата на денот на неговата втора инаугурација. Меланија Трамп доби од кралскиот пар сребрена емајлирана чинија од уметницата Кара Мерфи и торба дизајнирана од Ања Хиндмарч. Од друга страна, Трамп му подари на кралот реплика на мечот на претседателот Ајзенхауер, симбол на сојузништвото за време на Втората светска војна, додека кралицата Камила доби брош од Тифани во форма на цвет, украсен со дијаманти и рубини. Американскиот претседател и кралот Чарлс III се возеа со коњска запрега низ имотот Виндзор, додека Камила и Меланија Трамп ги следеа во друга запрега.
Свечената вечера во замокот Виндзор, стар девет века, е закажана за вечерва. Во делегацијата што допатува во кралството се бројни Трампови официјални лица, пријатели и сојузници. По престојот во Виндзор, Трамп ќе се сретне со британскиот премиер Киер Стармер во четврток. Американскиот претседател и првата дама ќе преноќат во замокот, иако Трамп одбил да ја користи кралската постелнина, инсистирајќи неговите помошници да обезбедат постелнина увезена од Соединетите Американски Држави.