Две лица го загубија животот, а едно е тешко повредено во сериозна сообраќајна несреќа што се случи на новиот експресен пат Прилеп – Градско, во близина на клучката за Кавадарци. Црната статистика ја потврдија од кавадаречката Брза помош и Територијалната противпожарна единица, чии екипи веднаш интервенирале на теренот.
Според првичните информации до кои дојде МИА, несреќата била предизвикана од директен судир помеѓу две возила.
„Директно се судриле две возила. Во едното загинале две лица од машки и женски пол, а едно тешко повредено лице на 39 години од Прилеп од другото возило, било транспортирано во тешка здравствена состојба до Општа болница Кавадарци со тешки повреди“, појасни доктор Антоан Паракеов, раководител на Итна медицинска помош Кавадарци.
Од надлежните служби во моментов не соопштуваат дополнителни детали за причините кои довеле до трагедијата.
Очевидци кои се затекнале на местото на настанот сведочат за брзата реакција на спасувачките тимови. Тие посочуваат дека Итната медицинска помош и Противпожарната дошле најбрзо што можеле на лице место. Пожарникарите морале да интервенираат за да го извлечат преживеаниот, но тешко повреден маж од едниот автомобил, по што тој итно бил пренесен во болница.