Единаесетгодишно момче од Пенсилванија е обвинето за убиство, откако наводно смртно го застрелало својот татко затоа што му ја одзел конзолата за игри. Инцидентот се случил на 13 јануари во семејниот дом во Данканон, пренесува „Гардијан“.
Полицијата, по пријава за маж во несвест, го пронашла 42-годишниот Даглас Диц мртов во неговиот кревет со прострелна рана во главата. Според истрагата, момчето влегло во собата извикувајќи „Тато е мртов“, а пред мајка си признало: „Јас го убив тато“.
Трагедијата се случила откако таткото му рекол на синот дека е време за спиење, што кај детето предизвикало гнев. Момчето го пронашло клучот од сефот за оружје додека ја барало својата конзола „Nintendo Switch“, по што го зело пиштолот и испукало еден куршум.
„Пукав во некого“, одговорило момчето на полициските прашања. Инспекторите додадоа дека „тој признал дека имал намера да пука во некого, кого го идентификувал како свој татко“.
На прашањето што мислел дека ќе се случи, детето изјавило дека било луто и не размислувало за последиците. На момчето му е одредена мерка притвор без право на кауција, а судењето е закажано за 22 јануари.