Во рамки на денешното пуштање во употреба на реконструираниот дел од аеродромот „Св. Апостол Павле“ во Охрид, министерот за внатрешни работи Панче Тошковски соопшти дека е извршена целосна реконструкција и на објектите на граничната полиција.
Според Тошковски, со новите простории и кабини за пасошка контрола ќе се овозможи побезбеден и поефикасен проток на патниците.
„Денеска во Охрид беше пуштен во употреба реконструираниот дел од аеродромот „Св. Апостол Павле“, со современ терминал, подобри услови за патниците и поефикасен проток при граничните контроли. Особено значајно е што целосно е реконструирана и Полициската станица за граничен премин, со нови и функционални простории и современи кабини за пасошка контрола“, наведе министерот во својата објава.
Тој потенцираше дека активностите за модернизација на инфраструктурата на граничните премини ќе продолжат и во следниот период.
„Продолжуваме со модернизација на граничните премини, подобри услови за македонската полиција и поквалитетна услуга за граѓаните и посетителите на Македонија“, истакна Тошковски.