Стотици граѓани од Македонија биле измамени преку лажна интернет-платформа за инвестирање, на која им биле ветувани заработки што никогаш не ги добиле.
За измамата, која се одвивала од декември 2025 до април 2026 година преку мобилна апликација и канал со неколку стотици претплатници, кривично се пријавени 56-годишна жена од Битола и 38-годишен маж од Естонија.
Според полицијата, осомничените ги наведувале граѓаните да вложуваат пари ветувајќи им сигурни добивки, а со тоа им предизвикале значителна финансиска штета. Досега се доставени пет пријави од оштетени лица, но финансиските анализи покажале дека бројот на измамени граѓани е многу поголем и се брои во стотици.
Случајот бил откриен по повеќемесечна истрага во која учествувале и меѓународни институции. Полицијата извршила форензичка анализа на електронски уреди и ги следела криптовалутните трансакции, преку кои биле обезбедени информации за сопственикот на криптопаричникот.
Од МВР предупредуваат граѓаните да не наседнуваат на понуди за брза и лесна заработка преку интернет, особено кога станува збор за инвестиции во криптовалути со ветувања за високи и загарантирани приноси.