Лицата кои живеат со мултиплекс склероза наскоро ќе може да ја добиваат потребната терапија во местото каде што живеат. Ова денеска, на одбележувањето на Светскиот ден на лицата со мултиплекс склероза – 30 мај, го најави директорот на Фондот за здравствено осигурување, Сашо Клековски.
Со новата набавка на лекови, тие повеќе нема да се дистрибуираат само на Клиниката за неврологија во Скопје, туку и во болниците во Битола, Куманово и Струмица, односно онаму каде што има повеќе пациенти и каде што работат невролози.
„Имаме договор за децентрализација на терапијата и на интерфероните и на биолошката терапија. Дистрибуцијата нема да биде само на Клиниката за неврологија. Интерферони ќе има во болници со повеќе пациенти и каде има невролози, бидејќи без невролози, следење на терапијата е неможно. За почеток ќе биде во Битола Куманово, Струмица, како и во местата каде има повеќе пациенти така и во места кои се поодалечени од Скопје“, изјави Клековски.
Директорот на ФЗОМ потенцираше дека буџетот за лицата со МС за оваа година изнесува 45,1 милион денари, што е за трипати повеќе во споредба со 2022 година, а воедно се намалени и цените на потребните лекови.
„Лицата со мултиплекс склероза да живеат еден продуктивен живот, ако се рано откриени и примаат соодветна терапија. Стигмата се надминува и се охрабруваат луѓето да се појавуваат во јавноста и да водат нормален живот. Не е само зголемен паричниот износ. Oвозможено е да нема листи на чекање за биолошка терапија. Оваа терапија е животноизменувачка и ќе правиме напори да се опфатат сите нови пациенти. Одиме кон намалување на лекување на пациентите со интерферон и зголемување на повеќе пациенти на биолошка терапија“, изјави Клековски.
Тој додаде дека за аплицирање на биолошката терапија веќе се обучени медицински сестри и персонал во Градската општа болница „8-ми Септември“, како и во болниците во Штип и во „Св. Еразмо“ во Охрид.