Поранешниот претседател на Србија, Борис Тадиќ, во изјава за медиумите оцени дека по изборниот пораз на Српската напредна партија (СНС), најважна задача е демонтирање на постојниот систем и доведување на земјата во ред, без одмазднички чекори. Според него, СНС ќе се распадне бидејќи нејзиното опстојување зависи од капиталот на неколку луѓе, а губењето на власта ќе биде исклучително тешко за Александар Вучиќ.
Тадиќ ги коментираше промените во Србија, посочувајќи на долгогодишниот политички период на досегашната власт.
„Чекав 14 години ова да се случи, овој политички џган да ја напушти власта. Оној што ги нарече сите луѓе во опозицијата и во медиумите џган, усташи, негодници и така натаму, морам да кажам: тие се џган. Но, тоа не значи дека сега треба да се одмаздиме. Треба да ја ставиме земјата во ред“, рече Тадиќ.
Тој направи споредба меѓу сопствените политички мотиви и оние на претседателот Александар Вучиќ, изразувајќи сомнеж за тоа како тој ќе ја поднесе новата ситуација.
„Влегов во политиката кога луѓето умираа поради политиката, а Вучиќ влезе во политиката за да биде на власт, и само на власт. Значи, не знам како ќе го преживее ова, но мислам дека, познавајќи го, многу е тешко. Му посакувам сè најдобро, но исто така сакам Српската напредна партија да исчезне што е можно поскоро“, додаде тој.
Во однос на иднината на владејачката партија, поранешниот српски претседател прогнозира нејзина фрагментација поради начинот на кој е организирана и финансирана.
„Тоа е партија која е во сопственост на неколку луѓе. Кога ќе почнат да се занимаваат со својот капитал, и таа логика преовладува, и Српската напредна партија ќе се распадне“, додаде тој.