Триесет и петгодишниот Хашим Лубеси го загуби животот во Индонезија по нападнат од питон долг околу седум метри, кој прво го задавил, а потоа целосно го проголтал.
Инцидентот се случил во раните утрински часови на 27 јули во покраината Малуку. Додека Хашим се враќал дома во селото Гуаксакаи движејќи се низ шумата, змијата ненадејно излегла од грмушките и го зграпчила за ногата. Според информациите на порталот ladbible.com, тој претходно консумирал поголема количина алкохол.
Питонот се завиткал околу жртвата и го стиснал до смрт, а потоа го проголтал. Неговите роднини, загрижени што тој не се вратил дома, започнале потрага по шумскиот пат.
„На средина од патот, забележале крв на земјата, а потоа ги пронашле личните работи на жртвата, вклучувајќи ранец и сандали. Сведоците се загрижиле и го евидентирале она што го пронашле. Решиле да се вратат во селото и да ги известат другите жители. Потоа била организирана поширока потрага“, соопшти началникот на полицијата на островот Сула.
За време на пошироката акција, мештаните пронашле питон со зголемен стомак. По расекувањето на влекачот, внатре било пронајдено телото на Хашим, кое потоа му било предадено на семејството.
Поради инцидентот, полицијата упати апел за зголемена внимателност до локалното население.
„Ја повикуваме јавноста да биде внимателна кога одите во градините. Доколку е можно, треба да одите во шумата во парови, а не сами, за да го намалите ризикот од слични инциденти“, рече тој.
Овој трагичен настан доаѓа само еден месец по слични случаи во истата област, каде питон нападнал велосипедист кој одмора покрај пат, додека во Северен Малуку 44-годишна жена исто така го загуби животот на својата фарма.
Мрежестите питони важат за најдолги змии во светот кои го онеспособуваат пленот преку стегање и задушување.