Со едукативни и превентивни активности, денеска се одбележува Светскиот ден на мозочниот удар, со цел да се подигне свеста за важноста на навременото препознавање на симптомите и брзото реагирање.
По тој повод, Универзитетската клиника за неврологија организира централен настан на Медицинскиот факултет, на кој ќе присуствуваат министерот за здравство Сашо Клековски, директорот на Фондот за здравствено осигурување Златко Перински и директорот на Клиниката за неврологија, д-р Јован Божиновски.
Од Клиниката посочуваат дека мозочниот удар останува сериозен јавно-здравствен предизвик, поради што превенцијата, контролата на ризик-факторите и навременото лекување се од клучно значење за намалување на последиците и спасување животи.
Во пресрет на одбележувањето, Клиниката во изминатите два дена спроведе активности за информирање на граѓаните за ризиците, симптомите и можностите за превенција.
Вчера, во просториите на Клиниката беше организиран Отворен ден, во чии рамки граѓаните имаа можност да направат бесплатни доплер-прегледи на каротидните артерии. Претходно, на плоштадот „Македонија“, беа организирани бесплатни мерења на крвниот притисок, шеќерот и холестеролот во крвта, како и проценка на ризикот од мозочен удар.
Со овие активности, Клиниката за неврологија ја истакнува важноста на редовните превентивни прегледи, здравствената едукација и навременото барање медицинска помош при појава на предупредувачки симптоми.