Компанијата „Транснафта“ а.д. Панчево објави тендер за изградба на нафтовод што ќе ја поврзе границата со Унгарија со Нови Сад, јавуваат српските медиуми.
Тендерот опфаќа изведба на градежни работи, како и стручен надзор за реализација на проектот. Во тендерската документација се наведува дека изградбата на главниот нафтовод меѓу Унгарија и Србија претставува проект од национален интерес, чија цел е диверзификација на увозните правци и зголемување на безбедноста во снабдувањето со нафта на домашниот пазар.
Во моментов, Србија има само еден правец за увоз на нафта – преку Хрватска и нафтоводот Јанаф. Со реализацијата на новиот нафтовод, земјата ќе добие алтернативен коридор за снабдување преку Унгарија, низ која минува нафтоводот „Дружба“, еден од клучните енергетски коридори што снабдува значаен дел од Европа со сурова нафта.
Според проектната документација, нафтоводот е планиран за транспорт на нафта од типот REB („Russian Export Blend“).