Новата словенечка влада донесе одлука да ја укине забраната за влез на израелскиот премиер Бенјамин Нетанјаху и на двајца негови министри.
Како што пренесува агенцијата АП, овој чекор означува радикална промена во политиката кон Израел во споредба со претходната централно-левичарска влада во државата.
Новиот премиер Јанез Јанша, кој застана на чело на владата по изборите, дополнително ја укина забраната за увоз од еврејските населби, како и ембаргото за извоз и транзит на воено оружје до и од Израел.
Од словенечкото Министерство за одбрана појаснија дека трговијата со воена опрема е веќе доволно регулирана со националните закони и со строгите правила на ЕУ.
Властите во Љубљана нагласија дека целта на овие одлуки е отворање на политичката комуникација и дипломатските канали.
Владата изјави дека политичкиот дијалог и тивката дипломатија ќе помогнат „да се зајакне улогата на Република Словенија во напорите за постигнување траен мир на Блискиот Исток“, со акцент на „активна соработка“, наместо на мерки што „ги затвораат каналите за директна комуникација“.
Овој пресврт следува откако минатата година претходниот премиер Роберт Голоб ја воведе забраната за влез, поврзувајќи ја со потерницата од Меѓународниот кривичен суд.
Како дополнителен чекор на новата администрација, палестинското знаме беше отстрането од зградата на владата, иако претседателката Наташа Пирц Мусар подоцна го подигна на претседателската резиденција.
Како одговор на затоплувањето на односите, Израел најави дека наскоро ќе отвори своја амбасада во Словенија, со оглед на тоа што досега земјата дипломатски се покриваше од Виена.