Четири лица, од кои три деца и едно возрасно лице, го загубија животот откако автомобил налета и удри во група велосипедисти во југозападниот дел на Холандија.
Страотната сообраќајна несреќа се случила во близина на местото Фогелварде, во покраината Зеланд, кога возило излетало од патот и удрило во група од 14 ученици и двајца возрасни кои биле на училишна екскурзија.
Три лица починале на самото место, додека четири со тешки повреди биле пренесени во болница, каде подоцна едно од нив им подлегнало на повредите.
Полицијата веднаш привела 19-годишен маж, но се уште се истражува неговата точна поврзаност со несреќата и дали тој бил зад воланот.
Локалните медиуми јавуваат дека возачот не ја следел кривината на патот, продолжил право и удрил во децата кои се движеле по посебната велосипедска патека. Настраданите ученици биле од основно училиште во градот Аксел.
Во масовната спасувачка акција на терен биле ангажирани дури седум амбулантни возила и три медицински хеликоптери, а повредените се згрижени во болници во Гент, Антверпен и Ротердам.
По повод трагедијата со официјална изјава излезе и холандскиот премиер Роб Јетен, кој истакна дека е шокиран од настанот.
„Она што требаше да биде еден од најубавите денови за секое дете и секое основно училиште – училишната екскурзија – заврши во кошмар“, изјави тој.