Министерката за енергетика, рударство и минерални суровини, Сања Божиновска, денеска во Истанбул учествува на Бизнис форумот Северна Македонија – Турција, посветен на продлабочување на економската соработка и привлекување инвестиции.
Како што соопштуваат од Министерството за енергетика, на форумот присуствува владина делегација предводена од премиерот Христијан Мицкоски, во чиј состав се министри од економскиот, енергетскиот и инфраструктурниот сектор. Домаќин на настанот од турска страна е министерот за трговија Омер Болат, а организатори се турското Министерство за трговија и Советот за надворешни економски односи (DEİK).
Форумот ги обединува претставниците на институциите и бизнис-заедниците од двете земји со цел зголемување на трговската размена и поттикнување нови инвестициски иницијативи.
Во рамки на форумот, министерката Божиновска ќе учествува на панел-дискусијата „Билатерална соработка во трговијата, индустријата, производството и синџирите на снабдување“, каде ќе ги претстави можностите што ги нуди Северна Македонија во секторите енергетика, рударство и минерални суровини, како и реформските процеси насочени кон создавање стабилна, предвидлива и конкурентна инвестициска клима.
Предвидено е Божиновска да оствари и билатерална средба со турскиот министер за трговија Омер Болат, на која ќе се разговара за унапредување на економската соработка, зголемување на турските инвестиции и можностите за партнерства во енергетиката и стратешките индустрии.