Претседателката Гордана Сиљановска-Давкова денеска во Софија ќе учествува на Самитот на шефови на држави и влади на земјите од Процесот за соработка во Југоисточна Европа (ПСЈИЕ). На маргините на состанокот, таа ќе оствари билатерални средби со претседателката на Република Бугарија, Илијана Јотова, и со в.д. претседателката на Република Косово, Албулена Хаџиу.
На Самитот, Сиљановска-Давкова ќе се обрати на пленарната сесија на тема „Компас кон стабилност, безбедност и одржливост“.
Во изјава пред заминувањето, претседателката нагласи дека средбата со бугарската претседателка Јотова претставува продолжение на претходните контакти и можност за зајакнување на довербата меѓу двете земји, при што очекува да се отворат и суштински прашања во билатералните односи.
Таа посочи дека градењето доверба меѓу државите е клучно преку директни контакти и заеднички проекти, истакнувајќи дека дијалогот и соработката се најдобриот начин за унапредување на односите.
Домаќин на Самитот е претседателката на Бугарија, Илијана Јотова, а учество најавија и претседателите на Албанија, Словенија и Црна Гора, претседавачот на Претседателството на Босна и Херцеговина, премиерот на Молдавија, како и високи претставници од Турција, Грција и Хрватска, заедно со Генералниот секретар на Регионалниот совет за соработка.
Пред почетокот на Самитот ќе се одржи и состанок на министрите за надворешни работи во рамки на бугарското претседавање со ПСЈИЕ, на кој ќе учествува министерот Тимчо Муцунски.
Процесот за соработка во Југоисточна Европа (ПСЈИЕ) претставува највисок политички форум за регионална соработка, основан во 1996 година во Софија. Денес обединува 13 земји од регионот, со цел унапредување на добрососедските односи, политичкиот дијалог и европската интеграција на Југоисточна Европа.