Претседателката и врховна командантка на Вооружените сили, Гордана Сиљановска-Давкова, денеска се обрати на одбележувањето на 17 Октомври – Денот на Командата за операции, во касарната „Боро Менков“ во Куманово.
Таа ја истакна клучната улога на Командата во одбраната на државата, нагласувајќи дека оперативната подготвеност се темели врз знаење, дисциплина и способност за навремено дејствување.
Осврнувајќи се на историските корени, претседателката потсети на Кресненското востание од 1878 година и додаде дека обврската за заштита на татковината останува непроменета. Според неа, современите предизвици како хибридното војување, сајбер-заканите и вештачката интелигенција бараат постојана модернизација.
„Членството во НАТО е наша стратешка определба, но и заложба за почитување на принципите на колективната одбрана и солидарност. Со извршувањето на преземените обврски и усогласувањето со стандардите на Алијансата, македонската Армија покажа дека и мала држава може да биде кредибилен и доверлив сојузник“, истакна Сиљановска-Давкова.
Во своето обраќање, таа посебно го нагласи придонесот на војниците во мировните мисии, како и нивната хумана улога при справувањето со природни непогоди и пожари.
„Не случајно, по повод Денот на Армијата, на 18 август, ја одликував Командата за операции со ’Орден за воени заслуги‘. Високото државно признание го валоризираше вашиот несомнен успех во изградбата и унапредувањето на армиските капацитети“, рече претседателката.
Упатувајќи признание за професионалноста на сите припадници, таа порача: „Со Вас се чувствуваме безбедни и сигурни. Нека ви е честит 17 Октомври – Денот на Командата за операции!“.