Во Скопје синоќа беше одбележан Националниот ден на Република Унгарија. На приемот, организиран од унгарскиот амбасадор Андраш Клајн, присуствуваше и претседателката на Македонија, Гордана Сиљановска Давкова.
Претседателката Сиљановска Давкова на својот Фејсбук профил го истакна значењето на македонско-унгарското пријателство:
„Долгогодишното македонско-унгарско пријателство се темели на силни економски врски, културни и академски програми, заеднички иницијативи, како и на соработката во одбраната. Унгарија останува искрен и посветен поддржувач на македонскиот евроинтеграциски пат, препознавајќи ги нашите напори за стабилност и реформи, засновани на европските вредности.“
Таа изрази уверување дека партнерството меѓу двете земји ќе продолжи да се развива во духот на взаемна почит и солидарност.
На приемот по повод Националниот ден на Унгарија, покрај претседателката, присуствуваа и: Панче Тошковски, Гордана Димитриеска Кочоска, Весна Јаневска, како и претставници од Собранието, локалната самоуправа, бизнис заедницата и дипломатскиот кор.