Сенатот на Соединетите Американски Држави денеска усвои закон за национална одбрана вреден 901 милијарда долари и го испрати на потпис во Белата куќа. Американскиот претседател Доналд Трамп веќе изјави дека ќе го потпише законот, со што тој ќе стапи во сила. Сенатот го одобри предлог-законот со 77 гласа „за“ и 20 „против“, со поддршка од двете партии. Минатата недела истиот закон беше усвоен и во Претставничкиот дом.
Со новиот закон се предвидуваат рекордни воени трошоци, вклучувајќи зголемување на платите на воениот персонал за четири проценти, инвестиции во вооружување и мерки за јакнење на конкурентноста на САД во однос на Кина и Русија.
И покрај Стратегијата за национална безбедност на администрацијата на Трамп и преиспитувањето на односите со Европа, законот содржи одредби за јакнење на безбедноста на европскиот континент.
Поддршка за Украина и Балтикот
Законот предвидува 800 милиони долари за Украина, распоредени по 400 милиони годишно во следните две години, преку механизам кој финансира испораки на оружје од американски компании за Киев.
Исто така, се обезбедуваат 175 милиони долари за Балтичката безбедносна иницијатива, наменети за поддршка на одбраната на Летонија, Литванија и Естонија. Со законските одредби се ограничува можноста бројот на американски војници во Европа да се намали под 76.000 и се забранува командантот на американските сили во Европа да се откаже од функцијата врховен командант на НАТО.
Контроверзни и дополнителни одредби
Предлог-законот не ја вклучува идејата за преименување на Министерството за одбрана на САД во Министерство за војна, предлог кој претходно го лансираше Трамп. Сепак, се вклучува одредба со која трансродови жени не можат да учествуваат во женски спортски програми во воените академии.