СДСМ обвинува дека владините политики на ВМРО-ДПМНЕ предводена од Христијан Мицкоски придонесуваат за влошување на животниот стандард и раст на трошоците за живот. Од партијата реагираат на најновите податоци на Државниот завод за статистика, според кои инфлацијата во октомври изнесувала 3,3 проценти во споредба со истиот месец минатата година, додека цените на мало бележат раст од 3,2 проценти.
Од СДСМ посочуваат дека семејната потрошувачка кошничка во октомври надминала 70.000 денари, а со вклучена кирија достигнала околу 90.000 денари. Истовремено, минималната плата останува на 26.000 денари, поради што, според партијата, голем број семејства тешко ги покриваат основните месечни потреби.
Како дополнителен показател за состојбата со работниците, СДСМ наведува дека од околу 540.000 вработени, приближно 180.000 примаат плата пониска од 31.200 денари месечно. Од партијата ја критикуваат Владата и за одбивањето на барањето минималната плата да се зголеми на 600 евра.
Во реакцијата се отвора и прашањето за најавените поскапувања на електричната енергија и парното од следната година. Според СДСМ, во Буџетот нема доволно средства за мерки со кои би им се помогнало на граѓаните да се справат со зголемените трошоци.
Опозициската партија ја обвинува Владата за лошо управување со јавните финансии, наведувајќи дека буџетот се соочува со недостиг од околу 900 милиони евра и дека се акумулираат нови задолжувања кои ќе ги враќаат и идните генерации.
Од СДСМ упатуваат критики и за трошењето на јавните пари, обвинувајќи ја власта дека средствата се насочуваат кон, како што велат, сомнителни партиски тендери, наместо кон зголемување на платите и поддршка на граѓаните.
Партијата порачува дека за состојбите со јавните финансии, животниот стандард и трошењето на буџетските средства мора да има одговорност пред граѓаните и надлежните институции.