Опозициската СДСМ на денешната прес-конференција упати жестоки критики до Владата, премиерот Христијан Мицкоски и министерот за здравство Сашо Клековски, обвинувајќи за неспособност и колапс на системот во справувањето со здравствените кризи во Гостивар и Скопје.
Од партијата посочија дека додека граѓаните се соочуваат со епидемиолошки закани, надлежните не преземаат соодветни мерки.
„Со Мицкоски, Клековски и ВМРО, здравјето на граѓаните е загрозено. На Клековски и Мицкоски им му се случија две здравствени кризи ама тие заминаа на одмор, на екскурзија. Наместо превенција, наместо итна реакција и решение, во двете кризи видовме целосен распад на системот и неспособност на Клековски и ВМРО“, наведуваат од СДСМ.
Во однос на состојбата со водата за пиење во Гостивар, од опозициската партија истакнаа дека сè уште нема официјални документи за нејзината исправност.
„Во Гостивар, граѓаните беа отруени, со недели без безбедна вода за пиење. 5.000 граѓани завршија во болница. По пет недели, и сега откако велат дека водата е безбедна, нема објавено ниту еден официјален документ кој ќе го потврди тоа. Резултатите од анализите на водата, кои не се објавуваат веќе пет недели, внесуваат несигурност и создаваат паника кај граѓаните. Ако сè е исправно, зошто резултатите досега не се објавени, кога испитувањата се прават секојдневно? Што се крие од граѓаните, додека министерот повикува на транспарентност? Сака да ги објави резултатите од 2017 година, а не сака да ги објави денешните. Тоа само покажува дека нешто не е во ред“, се вели во соопштението.
Од СДСМ реагираат и на ширењето на вирусот на западнонилска треска во главниот град, наведувајќи дека има 35 потврдени случаи, три смртни исходи и шест лица во критична состојба на интензивна нега.
„Од една криза во друга. Од една епидемиолошка закана во друга. Пак задоцнето, сега допрва мерки, сега допрва прскање. Тотален колапс и хаос. Клековски, како и неговиот шеф Мицкоски, ги оставија граѓаните и заминаа на екскурзија. Додека Клековски ја сведува борбата против западно-нилскиот вирусот на апели за пријавување мртви гаврани и празнење на базени, граѓаните секојдневно се изложени на ризик. Ова е уште еден доказ за целосниот распад на системот. Општините не спроведуваат навремено прскање против комарци. Центрите за јавно здравје немаат капацитет за системска ентомолошка контрола. Агенцијата за храна и ветеринарство реагира само декларативно, без масовни проверки на живината. Резултатот е трагичен: заболени граѓани, смртни случаи и пациенти во критична состојба. Наместо системска акција според протокол – има молк, неспособност и префрлање на одговорноста врз граѓаните“, додаваат од партијата.
Со цел надминување на состојбите, опозициската партија излезе со листа на барања за итно постапување од страна на сите надлежни органи.
„СДСМ бара итна и системска реакција: следење на популацијата на комарци на територијата на град Скопје, лабораториско тестирање на примероци за присуство на вирусот, масовна дезинсекција и уништување на жариштата – канали, бари и водни површини. Да се направи итна контрола на живината и дивите птици, пријавување и тестирање на мртви птици. И, најважно, итна институционална координација помеѓу Министерството за здравство, центрите за јавно здравје, општините и Агенцијата за храна и ветеринарство. Граѓаните не смеат да бидат единствениот ‘аларм’ за епидемијата. Владата треба да ги штити нив. Клековски не може да го обезбеди тоа и треба да понесе одговорност“, соопштија од СДСМ.