Уште колку животи треба да згаснат за да има одговорност?
Уште колку трагедии треба да се случат за Панче Тошковски да поднесе оставка?
Јавноста е во тага, во шок, но и во огромен бес, велат од СДСМ преку писмено соопштение испратено до медиумите.
Последната трагедија во скопската населба Карпош, во која згаснаа животите на мајка и малолетна ќерка, ја потресе целата држава. МВР предводено од Панче Тошковски не успеа да ги заштити.
Две години имало пријави за семејно, физичко и психичко насилство врз младата Ивана. Дури 12 пријави биле поднесени.
Во Велес, сериски насилник одзеде два животи – на младата Росица и на нејзиниот татко. И таму МВР потфрли. Веќе шест месеци се води предистрага дали 11 полицајци постапиле соодветно.
Во кумановско Старо Нагоричане, сериски убиец одзеде пет женски животи. Жителите со години предупредувале и пријавувале, но МВР ги игнорирала сигналите за опасност.
Во трагедијата во Кочани згаснаа 64 човечки животи. Наместо одговорност, Тошковски ги штитеше своите началници.
Сите овие трагедии имаат заедничка точка – систем што потфрла и МВР на Тошковски што не реагираат навреме.
Наместо одговорност, Панче Тошковски прави сè за да ја тргне вината од себе. Организира собири со празни ветувања дека институциите ќе штителе 24/7, додека токму тој ја води институцијата која треба да штити.
Сè е пропаганда. Никаде нема одговорност.
Но пропагандата нема да ги врати изгубените човечки животи.
Денот на жената е ден кога жените го креваат својот глас против насилството, несоодветното постапување на институциите и неправдата.
Нема да молчиме. Доста е од жртви и трагедии.
Одговорност мора да има.
Оставка од Панче Тошковски – веднаш!, стои во реакцијата на СДСМ.