Бугарскиот претседател Румен Радев упати нови пораки до официјално Скопје, потенцирајќи дека македонското раководство прави сè што може за да го одложи зачленувањето во Европската Унија и порача дека нема потреба од средба со македонскиот премиер Христијан Мицкоски.
Ваквиот став на Радев следува по усвојувањето на најновиот извештај за напредокот на Македонија во Европскиот парламент, каде јасно се нотирани обврските на земјава.
Во финалниот текст на Европскиот парламент останува Вториот протокол од Договорот за добрососедство со Бугарија, а од историската комисија се бара да постигне јасни и опипливи резултати. Дополнително, се потврдува обврската за спроведување на договорот со Бугарија и се нагласува дека уставните измени се главниот услов за отворање на првиот преговарачки кластер.
Повод за реакцијата на бугарскиот претседател беше и инцидентот во кој беа запалени два дипломатски автомобили пред бугарската амбасада во Скопје. На прашањето за можна средба со Мицкоски, Радев оцени дека „нема што повеќе да си кажат“.
„Кога присуствував на средба во Црна Гора, забележав сериозни отстапувања во позициите на некои лидери. Повторно треба да вложиме максимални напори да ги убедиме каде и како треба да се постави Европа како заеднички сојуз, за да ги заштитиме интересите и правата на сите граѓани. Постоело колебање во ставовите на повеќе европски лидери во периодот додека ме немаше во ЕУ. Некој не си ја завршил работата. Сега повторно треба да ги убедиме лидерите дека консензусот постигнат во јули 2022 година мора да се почитува.“
Пораките на шефот на бугарската држава јасно укажуваат на продолжен притисок врз Скопје за исполнување на обврските од 2022 година.
Вклучувањето на Бугарите во Уставот, имплементацијата на договорените протоколи и мерливиот напредок на историската комисија остануваат клучниот предуслов за каков било реален исчекор на Македонија во пристапните преговори со Унијата.