Новата учебна 2026/2027 година денеска започна за 551 прваче во осумте општински основни училишта во Општина Центар.
По повод првиот училиштен ден, градоначалникот Горан Герасимовски го посети ООУ „11 Октомври“, каде ги поздрави најмладите ученици, нивните родители и наставниците.
Герасимовски им посака успешен почеток на школувањето, нагласувајќи дека првиот училиштен ден е важен момент кој останува во сеќавање.
„Денес нашите 551 прваче го започнуваат едно од најубавите животни патувања. Ќе учат, ќе стекнуваат нови пријателства, ќе го откриваат светот и ќе растат во личности со свои соништа и вредности. Наша обврска е да им ги обезбедиме најдобрите можни услови“, порача Герасимовски.
Од Општина Центар информираат дека и оваа учебна година продолжуваат мерките за поддршка на учениците и нивните семејства.
Сите првачиња добиваат бесплатни ранци, додека учениците од прво до деветто одделение ќе добијат бесплатни училишни униформи. Од годинава започнува и субвенционирањето на оброците за учениците од прво до трето одделение, со намера до крајот на мандатот оброкот да биде целосно бесплатен.
За учениците од погорните одделенија се најавува и воведување бесплатни екскурзии.
Паралелно со мерките за поддршка, Општината продолжува со инвестиции во училиштата, подобрување на условите за настава и спорт, како и со активности за поддршка на талентираните ученици.
Герасимовски нагласи дека целта е училиштата да бидат средина во која децата ќе стекнуваат знаење, но и ќе ги развиваат вредностите на почитување, толеранција и солидарност.
„Сакаме училиштата да бидат места без насилство и булинг, а со повеќе другарство и меѓусебна поддршка. Грижата за учениците не е само проект, туку наша обврска и инвестиција во иднината“, истакна градоначалникот.
На првачињата им посака здравје, среќа, нови пријателства и многу успеси, а на родителите и наставниците успешна учебна година.