Од утре, 1 септември, официјално започнува со работа првата линија од новиот проект „Градски воз“, додека официјалната промоција ќе се одржи во среда (2 септември) со почеток во 11:00 часот, информираат од Министерството за транспорт.
На официјалното пуштање во употреба најавено е присуство на премиерот Христијан Мицкоски, вицепремиерот и министер за транспорт Александар Николоски, директорите на ЈП МЖ Инфраструктура и МЖ Транспорт, Синиша Ивановски и Дејан Кошутиќ, како и градоначалниците на Скопје, Зелениково, Кисела Вода и Аеродром.
Симболичниот почеток ќе биде одбележан со патување на сите присутни со воз од железничката станица Зелениково до Новата железничка станица во Скопје.
Првата линија што влегува во функција ќе сообраќа на релацијата Зелениково – Ново Зелениково – Орешани – Јане Сандански – Драчево – Лисиче до Нова железничка станица Скопје. Сообраќајот ќе се реализира со три возови дневно според возен ред утврден од МЖ Транспорт, а пред нејзиното пуштање беше извршена целосна реконструкција на пругата за зголемување на брзината на движење.
Според ресорното министерство, проектот има за цел да овозможи побрз, поефикасен и поевтин јавен градски превоз за граѓаните од периферните и централните делови на градот, а истиот е интегриран и со редот на возење на ЈСП Скопје.
Од Министерството за транспорт информираат дека паралелно се работи и на проектирање на преостанатите две линии – втората линија од Нова железничка станица преку Бутел и Скопје-Север до Ѓорче Петров, како и третата линија од Нова железничка станица преку Автокоманда и Маџари до Општина Илинден.