Едно лице се здобило со полесни изгореници во пожарот што вчера избувна на потегот меѓу селата Долани и Љуботен во општина Штип, соопштија од Центарот за управување со кризи (ЦУК).
На повредениот граѓанин веднаш му била укажана соодветна медицинска помош, а засега нема информации за други настрадани лица.
Од страната кон селото Долани со помош на трактори навреме се изорани заштитни појаси во земјата.
По оваа брза интервенција, пожарот на тој дел е ставен под контрола и е спречено неговото понатамошно ширење кон населеното место.
Сепак, според последните податоци од ЦУК, огнената стихија во моментов се шири во правец кон селото Љуботен.
На овој терен со огнот се зафатени сува трева, нискостеблеста вегетација, како и дел од борова шума.
Во гаснењето на пожарот на терен се вклучени пожарникари од Територијалната противпожарна единица (ТППЕ) Штип.
На помош е пристигната и механизација од ЈП „Стипион“, локални жители со трактори, полициски службеници, како и екипи на Итната медицинска помош.