Полицијата синоќа кај Липково привела 36-годишен жител на село Гошинце поради сомнение за кривично дело „криумчарење“.
Како што информираат од МВР, околу 19:50 часот полициски службеници од Полициската станица за граничен премин и граничен надзор „Белановце“ забележале товарно возило „Мерцедес Спринтер“ управувано од С.С. и му дале знак да застане.
Возачот не постапил по наредбата и продолжил да се движи во правец на село Отља. По преземените мерки, полицајците успеале да го запрат возилото.
При извршениот преглед биле пронајдени големо количество стока без соодветна документација, меѓу која:
- 320 парчиња текстил;
- 28 парчиња обувки;
- 350 парчиња техничка стока;
- 78 парчиња лекови;
- 76 парчиња козметика;
- шест делови за возила;
- 377 парчиња друга стока.
За случајот бил известен јавен обвинител од Основното јавно обвинителство Куманово.
Од МВР информираат дека по целосното документирање на случајот против 36-годишникот ќе биде поднесена соодветна кривична пријава.