По барање на деканот, полицијата влезе на Филозофскиот факултет во Нови Сад, поради студентската блокада предизвикана од отпуштањето на професорката Јелена Клеут.
Деканот на Факултетот, Миливој Алановиќ, изјави дека во тек се разговори меѓу полицијата, факултетската администрација и студентите.
„Разговаравме со студентите, разговараме со полицијата, полицијата разговара со студентите“, рече Алановиќ.
Тој додаде дека блокадата мора да заврши, во спротивно ќе биде принуден да преземе мерки со цел факултетот да продолжи со нормално функционирање.
Студентите најавија блокада како реакција на одлуката за отпуштање на професорката Јелена Клеут, која денеска беше и официјално разрешена од работното место.
Продеканот упати апел до студентите да се откажат од блокадата. Студентите, пак, соопштија дека чекале до 14 часот одговор од деканот на нивното барање факултетот институционално да застане зад професорката и да направи сè што е можно за нејзино враќање на работа. Бидејќи добиле одговор дека факултетот не може да преземе дополнителни чекори, студентите донеле душеци и најавиле подолг престој во зградата.
Професорката Клеут се наоѓа во зградата заедно со студентите, каде што им се обратила со порака да продолжат да го бранат Универзитетот.
Митингот во нејзина поддршка започна во 12:00 часот во зградата на Филозофскиот факултет, под слоганот „Ако Клеут не предава, никој нема“.
Со доставувањето на решението за отпуштање, професорката формално го изгуби работното место на Филозофскиот факултет во Нови Сад. Во решението, во кое имале увид од агенцијата Бета, е наведено дека работниот однос на професорката по комуникологија завршил на 20 јануари „поради истекот на рокот на кој бил заснован“.
Инаку, ова не е првпат полицијата да интервенира на Филозофскиот факултет во Нови Сад – во текот на август и септември 2025 година, полициски сили беа присутни на факултетот речиси еден месец.