По апсењето на венецуелскиот претседател Николас Мадуро од страна на американските сили за време на викендот, претседателот Доналд Трамп и неговата администрација упатија серија предупредувања кон повеќе држави, меѓу кои Колумбија, Куба, Мексико, Иран и Гренланд – автономна територија на Данска, јавува Си-Ен-Ен.
Трамп порача дека целта на САД е стабилност и контрола во регионот.
„Нашата работа е да имаме земји околу нас кои се одржливи и просперитетни и каде што нафтата е дозволено слободно да тече“, изјави тој.
Американскиот претседател додаде дека „американската доминација на Западната хемисфера никогаш повеќе нема да биде доведена во прашање“.
Осврнувајќи се на Гренланд, Трамп рече дека островот е „стратешки важен од перспектива на националната безбедност“ и оцени дека Данска самостојно не може да ја гарантира неговата безбедност.
Трамп упати остри критики и кон колумбискиот претседател Густаво Петро, нарекувајќи го „болен човек кој сака да произведува кокаин и да го продава на САД“. Запрашан за можна интервенција, тој одговори: „Тоа ми звучи добро“.
Во врска со Куба, Трамп оцени дека „не е потребна акција“, бидејќи, според него, земјата „сега нема приходи“ од венецуелската нафта.
За Мексико, американскиот претседател повтори дека дрогата „се излева“ преку земјата и порача дека „Мексико мора да се собере“.
Во однос на Иран, каде што продолжуваат антивладините протести, Трамп упати остро предупредување: „Ако почнат да убиваат луѓе како што правеа во минатото, мислам дека САД ќе ги удрат многу силно“.