Пратеникот на ВМРО-ДПМНЕ, Бране Петрушевски, денеска обелодени скандал од огромни размери, обвинувајќи го поранешниот директор на „ЕСМ Снабдување со топлина“, Бујар Дардишта, дека заедно со уште 32 лица е вмешан во перење пари во висина од 2 милиони евра. Според партијата, Дардишта, како кадар на ДУИ одобрен од СДСМ, бил дел од шема за местење на тендер вреден 8 милиони евра во 2023 година за потребите на државната енергетска компанија.
Петрушевски на прес-конференцијата детално ја опиша постапката, посочувајќи дека раководството на ЕСМ наместило јавна набавка за „СКАД Ормари мониторинг ормар со ГСМ контролор“. За да се реализира планот,биле договорени две фирми – една од Куманово и една од Скопје. Кумановската фирма намерно настапила со непотполна документација и повисока цена, додека скопската фирма, која била предодредена да победи, понудила сума речиси идентична со проценетата вредност на набавката, иако таа информација не била јавно достапна.
Со оваа манипулација, според ВМРО-ДПМНЕ, на скопската фирма ѝ било овозможено да се стекне со противправна имотна корист од речиси 8 милиони евра. За да се прикријат трагите, осомничените пуштиле во оптек и трансактирале 2 милиони евра, со што го извршиле кривичното дело перење пари. Петрушевски запраша зошто Обвинителството чекало толку долго за да реагира и дали со тоа се штителе политичките нарачатели од врвот на претходната власт.