Заменикот-генерален секретар на ВМРО-ДПМНЕ и пратеник, Бране Петрушевски, на денешната прес-конференција ја обвини опозициската СДСМ и нејзиниот лидер Венко Филипче за двојни аршини во врска со случувањата околу Алта банка.
Петрушевски направи споредба со предметот за Еуростандард банка, посочувајќи дека реакцијата на опозицијата во сегашниот случај е лицемерна.
„СДС и Филипче да беа вака гласни за Еуростандард банка, како што денес се за Алта банка, можеби граѓаните тогаш, немаше да бидат оштетени“, рече Петрушевски.
Тој потсети на околностите под кои пропадна Еуростандард банка за време на претходната власт.
„Се сеќаваме дека во времето на Филипче и СДС, пропадна Еуростандард банка, која патем, долго време одобрувала кредити без покритие на фирми блиски до Заев. Истата Еуростандард банка во која тогашната министерка за финансии, Нина Ангеловска, неколку дена пред да пропадне банката, си повлече од неа 250 илјади евра“, истакна тој.
Пратеникот на ВМРО-ДПМНЕ посочи дека за разлика од сегашните постапки, тогашното раководство на Народната банка донело поинакви одлуки.
„Истата Еуростандард банка, за која власта на СДС и тогашното раководство на НБРМ не воведе администрација, туку директно и ја укина работата на банката, за да можат кредитите на фирмите блиски до Заев да пропаднат. Ете затоа им е криво на СДС и затоа работи Фројд кај Филипче. Тоа што вие сте посегале по криминал, ние тоа нема да го направиме“, изјави Петрушевски.